ਹਰਿਆਣਾ ਦੀ ਪਹਿਲਵਾਨ ਵਿਨੇਸ਼ ਫੋਗਾਟ ਦੇ ਓਲੰਪਿਕ ਚਾਂਦੀ ਦੇ ਤਗਮੇ ‘ਤੇ ਫੈਸਲਾ 13 ਅਗਸਤ ਨੂੰ ਆਵੇਗਾ। ਸਪੋਰਟਸ ਕੋਰਟ ਯਾਨੀ ਕੋਰਟ ਆਫ ਆਰਬਿਟਰੇਸ਼ਨ ਫਾਰ ਸਪੋਰਟਸ (ਸੀਏਐਸ) ਨੇ ਸ਼ਨੀਵਾਰ ਰਾਤ ਨੂੰ ਇਹ ਜਾਣਕਾਰੀ ਦਿੱਤੀ। ਪਹਿਲਾਂ 10 ਅਗਸਤ ਨੂੰ ਰਾਤ 9:30 ਵਜੇ ਫੈਸਲਾ ਸੁਣਾਇਆ ਜਾਣਾ ਸੀ ਪਰ ਅਦਾਲਤ ਨੇ ਇਸ ਦੀ ਸੀਮਾ ਵਧਾ ਦਿੱਤੀ।
ਵਿਨੇਸ਼ ਦੇ ਵਕੀਲ ਵਿਦੁਸ਼ਪਤ ਸਿੰਘਾਨੀਆ ਨੇ ਕਿਹਾ ਕਿ ਸੀਏਐਸ 13 ਅਗਸਤ ਨੂੰ ਆਪਣਾ ਫੈਸਲਾ ਸੁਣਾਏਗੀ। ਵਾਧੂ ਦਸਤਾਵੇਜ਼ ਜਮ੍ਹਾਂ ਕਰਾਉਣ ਦੀ ਸਮਾਂ ਸੀਮਾ 11 ਅਗਸਤ ਤੱਕ ਵਧਾ ਦਿੱਤੀ ਗਈ ਹੈ। ਅਦਾਲਤ ਵਿੱਚ ਵਿਨੇਸ਼ ਦੇ ਪੱਖ ਵਿੱਚ ਦਲੀਲਾਂ ਦਿੱਤੀਆਂ ਗਈਆਂ ਸਨ ਕਿ ਪਹਿਲਵਾਨ ਨੇ ਕੋਈ ਧੋਖਾਧੜੀ ਨਹੀਂ ਕੀਤੀ। ਫਾਈਨਲ ਵਿੱਚ ਪਹੁੰਚਣ ਤੋਂ ਬਾਅਦ, ਉਹ ਚਾਂਦੀ ਦੇ ਤਗਮੇ ਦੀ ਪੱਕੀ ਦਾਅਵੇਦਾਰ ਸੀ।
ਵਿਨੇਸ਼ ਦੇ ਇਸ ਫੈਸਲੇ ਬਾਰੇ ਜੈਵਲਿਨ ‘ਚ ਚਾਂਦੀ ਦਾ ਤਗਮਾ ਜਿੱਤਣ ਵਾਲੇ ਨੀਰਜ ਚੋਪੜਾ ਨੇ ਕਿਹਾ ਕਿ ਜੇਕਰ ਸਾਨੂੰ ਮੈਡਲ ਮਿਲਦਾ ਹੈ ਤਾਂ ਲੋਕ ਸਾਨੂੰ ਕੁਝ ਸਮੇਂ ਲਈ ਯਾਦ ਕਰਦੇ ਹਨ ਅਤੇ ਕਹਿੰਦੇ ਹਨ ਕਿ ਅਸੀਂ ਉਨ੍ਹਾਂ ਦੇ ਚੈਂਪੀਅਨ ਹਾਂ, ਪਰ ਜੇਕਰ ਸਾਨੂੰ ਮੈਡਲ ਨਹੀਂ ਮਿਲਦਾ ਤਾਂ ਫਿਰ ਉਹ ਸਾਨੂੰ ਯਾਦ ਨਹੀਂ ਕਰਦੇ, ਕੁੱਝ ਸਮੇਂ ਬਾਅਦ ਭੁੱਲ ਜਾਂਦੇ ਹਨ।”
ਤੁਹਾਨੂੰ ਦੱਸ ਦੇਈਏ ਕਿ ਵਿਨੇਸ਼ ਫੋਗਾਟ ਨੇ ਓਲੰਪਿਕ ਵਿੱਚ 50 ਕਿਲੋਗ੍ਰਾਮ ਭਾਰ ਵਰਗ ਵਿੱਚ ਕੁਸ਼ਤੀ ਕੀਤੀ ਸੀ। ਉਹ ਇੱਕ ਦਿਨ ਵਿੱਚ ਜਾਪਾਨ ਦੇ ਓਲੰਪਿਕ ਚੈਂਪੀਅਨ ਸਮੇਤ 3 ਪਹਿਲਵਾਨਾਂ ਨੂੰ ਹਰਾ ਕੇ ਫਾਈਨਲ ਵਿੱਚ ਪਹੁੰਚੀ ਸੀ। ਹਾਲਾਂਕਿ ਫਾਈਨਲ ਮੈਚ ਤੋਂ ਅਗਲੇ ਦਿਨ ਉਸ ਦਾ ਭਾਰ 100 ਗ੍ਰਾਮ ਵੱਧ ਨਿਕਲਿਆ। ਜਿਸ ਕਾਰਨ ਉਸ ਨੂੰ ਅਯੋਗ ਕਰਾਰ ਦਿੱਤਾ ਗਿਆ। ਵਿਨੇਸ਼ ਨੇ ਇਸ ਸਬੰਧੀ ਖੇਡ ਅਦਾਲਤ ਵਿੱਚ ਅਪੀਲ ਦਾਇਰ ਕੀਤੀ ਸੀ। ਜਿਸ ‘ਤੇ ਸੁਣਵਾਈ ਹੋਈ।
ਵਿਨੇਸ਼ ਫੋਗਾਟ ਦੀ ਪਟੀਸ਼ਨ ‘ਤੇ ਪੈਰਿਸ ਦੀ ਖੇਡ ਅਦਾਲਤ ‘ਚ ਸੁਣਵਾਈ ਪੂਰੀ ਹੋ ਗਈ ਹੈ। ਵਿਨੇਸ਼ ਨੇ ਵੀ ਇਸ ਵਿੱਚ ਵਰਚੁਅਲ ਤਰੀਕੇ ਨਾਲ ਹਿੱਸਾ ਲਿਆ। ਵਿਨੇਸ਼ ਨੇ ਕਰੀਬ ਇੱਕ ਘੰਟੇ ਤੱਕ ਆਪਣਾ ਪੱਖ ਪੇਸ਼ ਕੀਤਾ। ਕਰੀਬ 3 ਘੰਟੇ ਤੱਕ ਬਹਿਸ ਹੋਈ। ਵਿਨੇਸ਼ ਦੀ ਤਰਫੋਂ ਭਾਰਤੀ ਵਕੀਲ ਹਰੀਸ਼ ਸਾਲਵੇ ਅਤੇ ਵਿਦੁਸ਼ਪਤ ਸਿੰਘਾਨੀਆ ਨੇ ਵੀ ਆਪਣਾ ਪੱਖ ਪੇਸ਼ ਕੀਤਾ।
ਡਾ: ਐਨਾਬੈਲ ਬੇਨੇਟ ਨੇ ਵਿਨੇਸ਼, ਯੂਨਾਈਟਿਡ ਵਰਲਡ ਰੈਸਲਿੰਗ, ਇੰਟਰਨੈਸ਼ਨਲ ਓਲੰਪਿਕ ਕਮੇਟੀ ਅਤੇ ਆਈ.ਓ.ਏ ਦਾ ਪੱਖ ਲਗਭਗ 3 ਘੰਟੇ ਤੱਕ ਸੁਣਿਆ। ਇਸ ਤੋਂ ਪਹਿਲਾਂ ਸਾਰਿਆਂ ਨੂੰ ਆਪਣਾ ਹਲਫ਼ਨਾਮਾ ਦਾਖ਼ਲ ਕਰਨ ਲਈ ਵੀ ਕਿਹਾ ਗਿਆ ਸੀ। ਜਿਸ ਤੋਂ ਬਾਅਦ ਇਹ ਜ਼ੁਬਾਨੀ ਬਹਿਸ ਹੋਈ।
ਸਪੋਰਟਸ ਕੋਰਟ ‘ਚ ਵਿਨੇਸ਼ ਦੇ ਪੱਖ ‘ਚ ਕਿਹਾ ਗਿਆ ਕਿ 100 ਗ੍ਰਾਮ ਭਾਰ ਬਹੁਤ ਘੱਟ ਹੈ। ਇਹ ਐਥਲੀਟ ਦੇ ਭਾਰ ਦੇ 0.1% ਤੋਂ 0.2% ਤੋਂ ਵੱਧ ਨਹੀਂ ਹੈ. ਗਰਮੀਆਂ ਦੇ ਮੌਸਮ ਵਿਚ ਮਨੁੱਖੀ ਸਰੀਰ ਵਿਚ ਸੋਜ ਹੋਣ ਕਾਰਨ ਇਹ ਆਸਾਨੀ ਨਾਲ ਵਧ ਵੀ ਸਕਦੀ ਹੈ ਕਿਉਂਕਿ ਗਰਮੀ ਕਾਰਨ ਸਰੀਰ ਵਿਚ ਜ਼ਿਆਦਾ ਪਾਣੀ ਜਮ੍ਹਾ ਹੋ ਜਾਂਦਾ ਹੈ।
ਇਸ ਤੋਂ ਇਲਾਵਾ ਵਿਨੇਸ਼ ਨੂੰ ਇੱਕ ਦਿਨ ਵਿੱਚ 3 ਮੁਕਾਬਲਿਆਂ ਵਿੱਚ ਹਿੱਸਾ ਲੈਣਾ ਪਿਆ। ਇਸ ਦੌਰਾਨ ਉਨ੍ਹਾਂ ਨੂੰ ਐਨਰਜੀ ਬਰਕਰਾਰ ਰੱਖਣ ਲਈ ਖਾਣਾ ਵੀ ਖਾਣਾ ਪਿਆ।
ਇਸ ਤੋਂ ਇਲਾਵਾ ਭਾਰਤੀ ਟੀਮ ਦਾ ਕਹਿਣਾ ਹੈ ਕਿ ਖੇਡ ਪਿੰਡ ਅਤੇ ਓਲੰਪਿਕ ਖੇਡਾਂ ਦੇ ਅਖਾੜੇ ਵਿਚਕਾਰ ਦੂਰੀ ਅਤੇ ਪਹਿਲੇ ਦਿਨ ਕੁਸ਼ਤੀ ਦਰਮਿਆਨ ਘੱਟ ਸਮੇਂ ਕਾਰਨ ਵਿਨੇਸ਼ ਨੂੰ ਭਾਰ ਘਟਾਉਣ ਲਈ ਸਮਾਂ ਨਹੀਂ ਮਿਲਿਆ। ਪਹਿਲੇ ਦਿਨ 3 ਵਾਰ ਕੁਸ਼ਤੀ ਕਰਨ ਤੋਂ ਬਾਅਦ ਵਿਨੇਸ਼ ਦਾ ਭਾਰ 52.7 ਕਿਲੋਗ੍ਰਾਮ ਤੱਕ ਪਹੁੰਚ ਗਿਆ ਸੀ।
ਭਾਰਤੀ ਟੀਮ ਨੇ ਇਹ ਵੀ ਕਿਹਾ ਕਿ ਵਿਨੇਸ਼ ਦਾ 100 ਗ੍ਰਾਮ ਭਾਰ ਵਧਣ ਨਾਲ ਹੋਰ ਪਹਿਲਵਾਨਾਂ ‘ਤੇ ਕੋਈ ਫਾਇਦਾ ਨਹੀਂ ਹੋਵੇਗਾ। ਇਹ ਸਿਰਫ਼ ਇੱਕ ਜ਼ਰੂਰੀ ਰਿਕਵਰੀ ਪ੍ਰਕਿਰਿਆ ਦਾ ਨਤੀਜਾ ਸੀ। ਇਕ ਦਿਨ ‘ਚ ਲਗਾਤਾਰ 3 ਮੈਚ ਲੜਨ ਤੋਂ ਬਾਅਦ ਉਸ ਦੇ ਸਰੀਰ ਨੂੰ ਡਾਈਟ ਦੀ ਵੀ ਲੋੜ ਸੀ।
ਭਾਰਤੀ ਪੱਖ ਨੇ ਇਹ ਵੀ ਦਲੀਲ ਦਿੱਤੀ ਕਿ ਵਿਨੇਸ਼ ਫੋਗਾਟ ਦੇ ਮਾਮਲੇ ਵਿੱਚ ਕੋਈ ਧੋਖਾਧੜੀ ਜਾਂ ਦੁਰਵਿਵਹਾਰ ਨਹੀਂ ਹੈ। ਨਾ ਹੀ ਡੋਪਿੰਗ ਵਰਗਾ ਕੋਈ ਮੁੱਦਾ ਹੈ।
ਵਿਨੇਸ਼ ਨੂੰ ਸਖ਼ਤ ਮਿਹਨਤ ਦੇ ਬਾਵਜੂਦ ਚਾਂਦੀ ਦੇ ਤਗ਼ਮੇ ਤੋਂ ਵਾਂਝੇ ਨਹੀਂ ਰਹਿਣਾ ਚਾਹੀਦਾ ਕਿਉਂਕਿ ਉਸ ਨੇ ਪਹਿਲੇ ਸਾਰੇ ਮੈਚਾਂ ਵਿੱਚ ਵਧੀਆ ਮੁਕਾਬਲਾ ਕੀਤਾ ਅਤੇ ਫਾਈਨਲ ਵਿੱਚ ਅਯੋਗ ਕਰਾਰ ਦਿੱਤਾ ਗਿਆ।
ਇਸ ਬਾਰੇ ਭਾਰਤੀ ਓਲੰਪਿਕ ਸੰਘ (IOA) ਨੇ ਕਿਹਾ- ਭਾਰਤੀ ਓਲੰਪਿਕ ਸੰਘ ਸਕਾਰਾਤਮਕ ਨਤੀਜਿਆਂ ਦੀ ਉਮੀਦ ਕਰਦਾ ਹੈ। ਪ੍ਰਧਾਨ ਪੀਟੀ ਊਸ਼ਾ ਨੇ ਕਿਹਾ- ਵਿਨੇਸ਼ ਦਾ ਸਮਰਥਨ ਕਰਨਾ ਸਾਡਾ ਫਰਜ਼ ਹੈ। ਫੈਸਲਾ ਜੋ ਵੀ ਹੋਵੇ ਅਸੀਂ ਵਿਨੇਸ਼ ਦੇ ਨਾਲ ਖੜੇ ਹਾਂ।
