ਮੋਗਾ : ਪਤਨੀ ਨੇ ਕਰੀਬੀ ਰਿਸ਼ਤੇਦਾਰ ਔਰਤ ਨੂੰ ਸੌਂਕਣ ਬਣਾ ਕੇ ਘਰ ਵਿੱਚ ਲਿਆਉਣ ਦਾ ਵਿਰੋਧ ਕੀਤਾ ਤਾਂ ਪੰਜਾਬ ਪੁਲਿਸ ਦੇ ਇੱਕ ਕਾਂਸਟੇਬਲ ਨੇ ਉਸ ਨਾਲ ਜਾਨਵਰਾਂ ਵਰਗਾ ਸਲੂਕ ਕੀਤਾ l ਇੱਕ ਜਾਂ ਦੋ ਸਾਲ ਨਹੀਂ, ਬਲਕਿ ਪਿਛਲੇ 13 ਸਾਲਾਂ ਤੱਕ ਉਹ ਪਤਨੀ ‘ਤੇ ਜ਼ੁਲਮ ਕਰਦਾ ਰਿਹਾ l ਇਸ ਨਾਲ ਵੀ ਉਸ ਦਾ ਮਨ ਨਹੀਂ ਭਰਿਆ ਤਾਂ ਪਤਨੀ ਦਾ ਮੂੰਹ ਕਾਲਾ ਕੀਤਾ ਅਤੇ ਵਾਲ ਕੱਟ ਕੇ ਪਿੰਡ ਵਿੱਚ ਘੁਮਾਇਆ l ਇਲਜ਼ਾਮ ਹੈ ਕਿ ਸ਼ਿਕਾਇਤ ਕਰਨ ‘ਤੇ ਥਾਣਾ ਸਦਰ ਪੁਲਿਸ ਨੇ ਮੁਲਜ਼ਮ ਕਾਂਸਟੇਬਲ ਪਤੀ ਦੇ ਖਿਲਾਫ ਕਾਰਵਾਈ ਦੀ ਬਜਾਏ ਸਮਝੌਤਾ ਕਰਵਾ ਦਿੱਤਾ l ਹੁਣ ਪੀੜਿਤਾ ਐਸਐਸਪੀ ਅਮਰਜੀਤ ਸਿੰਘ ਬਾਜਵਾ ਨੂੰ ਮਿਲਣ ਪਹੁੰਚੀ l ਐਸਐਸਪੀ ਨੇ ਪੂਰੇ ਮਾਮਲੇ ਦੀ ਜਾਂਚ ਡੀਐਸਪੀ ਨੂੰ ਦਿੱਤੀ ਹੈ l
ਪਿੰਡ ਝੰਡੇਆਣਾ ਗਰਬੀ ਨਿਵਾਸੀ ਔਰਤ ਨੇ ਦੱਸਿਆ ਕਿ ਉਸ ਦਾ ਵਿਆਹ 15 ਸਾਲ ਪਹਿਲਾਂ ਕਾਂਸਟੇਬਲ ਇੰਦਰਜੀਤ ਸਿੰਘ ਨਾਲ ਹੋਇਆ ਸੀ l ਦੋ ਸਾਲ ਤੱਕ ਸਭ ਕੁਝ ਠੀਕ ਰਿਹਾ l ਫਿਰ ਪਤੀ ਦੇ ਜ਼ੁਲਮ ਸ਼ੁਰੂ ਹੋ ਗਏ, ਜੋ ਕਿ ਉਹ ਸਹਿਣ ਕਰਦੀ ਰਹੀ l ਉਸ ਨੇ ਇਲਜ਼ਾਮ ਲਾਇਆ ਕਿ ਪਤੀ ਦੇ ਕਰੀਬੀ ਰਿਸ਼ਤੇਦਾਰ ਕੁੜੀ ਦੇ ਨਾਲ ਗਲਤ ਸੰਬੰਧ ਹਨ l ਕੁੜੀ ਦੀ ਤਿੰਨ ਵਾਰ ਮੰਗਣੀ ਵੀ ਹੋਈ, ਜੋ ਕਿ ਪਤੀ ਨੇ ਤੁੜਵਾ ਦਿੱਤੀ l ਉਹ ਖੁਦ ਉਸ ਨਾਲ ਵਿਆਹ ਕਰਵਾਉਣਾ ਚਾਹੁੰਦਾ ਹੈ l ਵਿਆਹ ਦਾ ਵਿਰੋਧ ਕਰਨ ‘ਤੇ ਪਤੀ ਪਿਛਲੇ 13 ਸਾਲ ਤੋਂ ਉਸ ‘ਤੇ ਅੱਤਿਆਚਾਰ ਕਰ ਰਿਹਾ ਹੈ l ਔਰਤ ਨੇ ਦੱਸਿਆ ਕਿ ਅੱਤਿਆਚਾਰ ਤੋਂ ਦੁੱਖੀ ਹੋ ਕੇ 26 ਦਸੰਬਰ, 2014 ਨੂੰ ਪਤੀ ਦੇ ਖਿਲਾਫ ਐਫਆਈਆਰ ਦਰਜ ਕਰਵਾਈ, ਪਰ ਕਾਂਸਟੇਬਲ ਪਤੀ ਨੇ ਮਾਮਲਾ ਰਫਾ ਦਫਾ ਕਰਵਾ ਦਿੱਤਾ l ਪਿਛਲੇ ਸਾਲ 29 ਨਵੰਬਰ ਨੂੰ ਪਤੀ ਨੇ ਉਸ ਦੇ ਵਾਲ ਕੱਟ ਦਿੱਤੇ ਅਤੇ ਮੂੰਹ ਕਾਲਾ ਕਰ ਪਿੰਡ ਵਿੱਚ ਘੁਮਾਇਆ l ਪਿੰਡ ਦੇ ਕੁਝ ਲੋਕਾਂ ਨੇ ਵੀ ਪਤੀ ਦਾ ਸਾਥ ਦਿੱਤਾ l ਕੁਝ ਲੋਕਾਂ ਨੇ ਇਸ ਦੀ ਵੀਡੀਓ ਵੀ ਬਣਾ ਲਈ l ਮਾਮਲਾ ਥਾਣਾ ਸਦਰ ਵਿੱਚ ਪਹੁੰਚਿਆ ਤਾਂ ਪਿੰਡ ਦੇ ਹੀ ਇੱਕ ਵਿਅਕਤੀ ਨੇ ਸਮਝੌਤਾ ਕਰਵਾ ਕੇ ਮਾਮਲਾ ਰਫਾ ਦਫਾ ਕਰ ਦਿੱਤਾ l
ਔਰਤ ਨੇ ਦੱਸਿਆ ਕਿ ਇਸ ਦੇ ਬਾਅਦ ਪਤੀ ਦਾ ਜ਼ੁਲਮ ਹੋਰ ਵੱਧ ਗਿਆ l ਬੱਚੇ ਜਦ ਸਕੂਲ ਚੱਲੇ ਜਾਂਦੇ ਸਨ ਤਾਂ ਪਤੀ ਉਸ ਨੂੰ ਕਮਰਾ ਬੰਦ ਕਰ ਦਿੱਤਾ ਸੀ l 23 ਜਨਵਰੀ ਨੂੰ ਬੱਚਿਆਂ ਦੀ ਸ਼ਿਕਾਇਤ ‘ਤੇ ਪੁਲਿਸ ਨੇ ਊਸ ਨੂੰ ਛਡਵਾਇਆ ਅਤੇ ਪਤੀ ਦੇ ਖਿਲਾਫ ਐਫਆਈਆਰ ਦਰਜ ਕੀਤੀ l ਪਤੀ ਨੂੰ ਪੁਲਿਸ ਵਿਭਾਗ ਨੇ ਸਸਪੈਂਡ ਕਰ ਦਿੱਤਾ ਹੈ l ਹੁਣ ਰਿਸ਼ਤੇਦਾਰ ਸਮਝੌਤੇ ਦੇ ਲਈ ਲਗਾਤਾਰ ਧਮਕਾ ਰਹੇ ਹਨ l ਇਸ ਦੇ ਬਾਅਦ ਹੁਣ ਉਸ ਨੇ ਐਸਐਸਪੀ ਨੂੰ ਗੁਹਾਰ ਲਾਈ ਹੈ l ਔਰਤ ਦੇ ਨਾਲ ਉਸ ਦੀ 12 ਸਾਲ ਦੀ ਧੀ ਵੀ ਐਸਐਸਪੀ ਆਫਿਸ ਪਹੁੰਚੀ l
ਔਰਤ ਦੀ ਧੀ ਨੇ ਦੱਸਿਆ ਕਿ ਪਿਤਾ ਬੇਵਜਾ ਮਾਂ ਦੇ ਨਾਲ ਕੁੱਟਮਾਰ ਕਰਦਾ ਹੈ l ਇਸ ਕਾਰਨ ਉਸਦਾ ਅਤੇ 10ਵੀਂ ਵਿੱਚ ਪੜ ਰਹੇ ਭਾਈ ਦਾ ਭਵਿੱਖ ਖਰਾਬ ਹੋ ਰਿਹਾ ਹੈ l ਐਸਐਸਪੀ ਅਮਰਜੀਤ ਸਿੰਘ ਬਾਜਵਾ ਨੇ ਕਿਹਾ ਕਿ ਅਜਿਹੀ 200ਸ਼ਿਕਾਇਤਾਂ ਉਨ੍ਹਾਂ ਦੇ ਕੋਲ ਰੋਜ਼ ਆਉਂਦੀਆਂ ਹਨ l ਉਹ ਕਿਸ ਕਿਸ ‘ਤੇ ਆਪਣਾ ਧਿਆਨ ਦੇਣ l ਮਾਮਲੇ ਦੀ ਜਾਂਚ ਕਰ ਉੱਚਿਤ ਕਾਰਵਾਈ ਕੀਤੀ ਜਾਵੇਗੀ l
