ਜਲੰਧਰ ਵਿੱਚ ਪੁਲਿਸ ਨੇ ਜਾਲੀ ਸਬੂਤ ਲਗਾਏ
SSP ਨੇ ਜਾਂਚ ਦੇ ਹੁਕਮ ਦਿੱਤੇ
SHO ਸਮੇਤ 3 ਨੂੰ ਪੁਲਿਸ ਲਾਈਨ ਭੇਜਿਆ
ਜਲੰਧਰ ਦੇਹਾਤ ਪੁਲਿਸ ਘਰ ਵਿੱਚ ਰੇਡ ਕਰਨ ਦੇ ਮਾਮਲੇ ਵਿੱਚ ਵਿਵਾਦਾਂ ਵਿੱਚ ਘਿਰ ਗਈ ਹੈ। ਦਰਅਸਲ, ਸ਼ਾਹਕੋਟ ਥਾਣੇ ਵਿੱਚ 9 ਅਪ੍ਰੈਲ ਨੂੰ ਦਰਜ ਐਫਆਈਆਰ ਨੰਬਰ 90 ਵਿੱਚ ਦਾਅਵਾ ਕੀਤਾ ਗਿਆ ਕਿ ਪਿੰਡ ਦੌਲਤਪੁਰ ਢੱਡਾ ਦੇ ਨਿਵਾਸੀ ਅਕਰਮ ਦੇ ਘਰ ਰੇਡ ਕਰਕੇ 35 ਲੀਟਰ ਲਾਹਣ ਬਰਾਮਦ ਕੀਤੀ ਗਈ। ਪਰ ਇਸ ਘਟਨਾ ਦੀ ਇੱਕ ਵੀਡੀਓ ਸਾਹਮਣੇ ਆਉਣ ਤੋਂ ਬਾਅਦ ਪੁਲਿਸ ਵਿਵਾਦਾਂ ਵਿੱਚ ਆ ਗਈ।
ਇਸ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਐਸਐਸਪੀ ਹਰਵਿੰਦਰ ਸਿੰਘ ਵਿਰਕ ਨੇ ਸਖ਼ਤ ਕਾਰਵਾਈ ਕੀਤੀ। ਉਨ੍ਹਾਂ ਦੱਸਿਆ ਕਿ 9 ਅਪ੍ਰੈਲ ਨੂੰ ਐਕਸਾਈਜ਼ ਐਕਟ ਅਧੀਨ ਮਾਮਲਾ ਦਰਜ ਕੀਤਾ ਗਿਆ ਸੀ, ਜਿਸ ਵਿੱਚ ਰਿਕਾਰਡ ਮੁਤਾਬਕ ਅਕਰਮ ਤੋਂ 35 ਲੀਟਰ ਲਾਹਣ ਬਰਾਮਦ ਹੋਣ ਦੀ ਗੱਲ ਕਹੀ ਗਈ ਸੀ। ਪਰ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋਈ ਵੀਡੀਓ ਵਿੱਚ ਦਿਖਾਇਆ ਗਿਆ ਕਿ ਪੁਲਿਸ ਦੀ ਗੱਡੀ ਘਰ ਦੇ ਬਾਹਰ ਰੁਕਦੀ ਹੈ ਅਤੇ ਪੁਲਿਸ ਕਰਮੀ ਇੱਕ ਡਰਮ ਲੈ ਕੇ ਘਰ ਅੰਦਰ ਜਾਂਦੇ ਹਨ ਅਤੇ ਕੁਝ ਸਮੇਂ ਬਾਅਦ ਉਹੀ ਡਰਮ ਬਾਹਰ ਲੈ ਕੇ ਆਉਂਦੇ ਹਨ।
ਜਾਂਚ ਦੌਰਾਨ ਡੀਐਸਪੀ ਨੇ ਪਾਇਆ ਕਿ ਰਿਕਵਰੀ ਲਈ ਵਰਤਿਆ ਗਿਆ ਡਰਮ ਪੁਲਿਸ ਵੱਲੋਂ ਹੀ ਲਿਆਂਦਾ ਗਿਆ ਸੀ। ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਨਿਰਪੱਖ ਜਾਂਚ ਕੀਤੀ ਗਈ, ਜਿਸ ਤੋਂ ਬਾਅਦ ਥਾਣਾ ਸ਼ਾਹਕੋਟ ਦੇ ਇੰਸਪੈਕਟਰ (ਐਸਐਚਓ) ਬਲਵਿੰਦਰ ਸਿੰਘ, ਏਐਸਆਈ ਸੁਖਵਿੰਦਰ ਸਿੰਘ ਅਤੇ ਮਹਿਲਾ ਕਾਂਸਟੇਬਲ ਹਵਨਪ੍ਰੀਤ ਕੌਰ ਨੂੰ ਲਾਈਨ ਹਾਜ਼ਿਰ ਕਰ ਦਿੱਤਾ ਗਿਆ।
ਇਸਦੇ ਨਾਲ ਹੀ ਐਸਪੀ ਵਿਨੀਤ ਨੂੰ ਮਾਮਲੇ ਦੀ ਹੋਰ ਜਾਂਚ ਦੇ ਹੁਕਮ ਦਿੱਤੇ ਗਏ ਹਨ। ਉਨ੍ਹਾਂ ਕਿਹਾ ਕਿ ਜਾਂਚ ਦੌਰਾਨ ਜੇ ਕੋਈ ਦੋਸ਼ੀ ਪਾਇਆ ਗਿਆ ਤਾਂ ਉਸ ਖ਼ਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ। ਦੂਜੇ ਪਾਸੇ, ਅਕਰਮ ਦਾ ਬੈਕਗ੍ਰਾਊਂਡ ਚੈੱਕ ਕਰਨ ‘ਤੇ ਪਤਾ ਲੱਗਿਆ ਕਿ ਉਸਦਾ ਕਰਿਮਿਨਲ ਰਿਕਾਰਡ ਹੈ।
ਸੀਸੀਟੀਵੀ ਫੁਟੇਜ ਵਿੱਚ ਵੇਖਿਆ ਗਿਆ ਕਿ ਇੱਕ ਸਿਲਵਰ ਇਕੋਸਪੋਰਟ ਗੱਡੀ ਵਿੱਚੋਂ ਪੁਲਿਸ ਟੀਮ ਖੁਦ ਨੀਲਾ ਡਰਮ ਲੈ ਕੇ ਆਉਂਦੀ ਹੈ। ਡਰਮ ਖਾਲੀ ਨਹੀਂ ਸੀ ਕਿਉਂਕਿ ਇਸਨੂੰ ਦੋ ਲੋਕਾਂ ਵੱਲੋਂ ਚੁੱਕਿਆ ਜਾ ਰਿਹਾ ਸੀ। ਕੁੱਲ 7 ਪੁਲਿਸ ਕਰਮੀ ਕੈਮਰੇ ਵਿੱਚ ਕੈਦ ਹੋਏ। ਲਗਭਗ 13 ਮਿੰਟ ਵਿੱਚ ਬਰਾਮਦਗੀ ਦਿਖਾ ਕੇ ਵੀਡੀਓ ਰਿਕਾਰਡ ਕੀਤੀ ਗਈ ਅਤੇ ਡਰਮ ਨੂੰ ਸੀਲ ਕਰਕੇ ਲੈ ਜਾਇਆ ਗਿਆ।
ਜਾਣਕਾਰੀ ਮੁਤਾਬਕ, ਕਾਰਵਾਈ ਦੇ ਸਮੇਂ ਅਕਰਮ ਘਰ ਵਿੱਚ ਮੌਜੂਦ ਨਹੀਂ ਸੀ। ਪੁਲਿਸ ਦੀ ਐਫਆਈਆਰ ਵਿੱਚ ਲਿਖਿਆ ਹੈ ਕਿ ਐਕਸਾਈਜ਼ ਸਟਾਫ ਦੇ ਏਐਸਆਈ ਸੁਖਦੇਵ ਸਿੰਘ ਨੇ ਫੋਨ ਕਰਕੇ ਸੂਚਨਾ ਦਿੱਤੀ ਸੀ ਕਿ ਅਕਰਮ ਦੇ ਘਰ ਰੇਡ ਦੌਰਾਨ ਲਾਹਣ ਮਿਲੀ। ਇਸ ਤੋਂ ਬਾਅਦ ਏਐਸਆਈ ਸੁਖਵਿੰਦਰ ਸਿੰਘ ਟੀਮ ਨਾਲ ਮੌਕੇ ‘ਤੇ ਪਹੁੰਚੇ। ਤੂੜੀ ਵਾਲੇ ਕਮਰੇ ਵਿੱਚ ਨੀਲੇ ਪਲਾਸਟਿਕ ਡਰਮ ਵਿੱਚ 35 ਲੀਟਰ ਲਾਹਣ ਬਰਾਮਦ ਹੋਣ ਦੀ ਗੱਲ ਦਰਜ ਕੀਤੀ ਗਈ। ਮੌਕੇ ‘ਤੇ ਹੀ ਡਰਮ ਖੋਲ੍ਹ ਕੇ ਜਾਂਚ ਕੀਤੀ ਗਈ, ਸੈਂਪਲ ਲਏ ਗਏ ਅਤੇ ਡਰਮ ਨੂੰ ਰੱਸੇ ਨਾਲ ਬੰਨ੍ਹ ਕੇ ਸੀਲ ਕੀਤਾ ਗਿਆ। ਅਕਰਮ ਖ਼ਿਲਾਫ਼ ਆਬਕਾਰੀ ਐਕਟ ਦੀ ਧਾਰਾ 61 ਹੇਠ ਮਾਮਲਾ ਦਰਜ ਕੀਤਾ ਗਿਆ ਹੈ।,,,,,,ਵੀਡੀਓ ਦੇਖਣ ਲਈ ਹੇਠਾਂ ਦਿੱਤੇ ਲਿੰਕ ‘ਤੇ ਕਲਿੱਕ ਕਰੋ……..
