ਰੇਲਵੇ ਵਿਭਾਗ ਦੀ ਕਰਾਈਮ ਜਾਂਚ ਬ੍ਰਾਂਚ ਨੇ ਰੇਲਵੇ ਦੀ ਵੈਬਸਾਈਟ ਹੈਕ ਕਰਕੇ ਫਰਜ਼ੀ ਤਰੀਕੇ ਨਾਲ ਈ ਟਿਕਟਾਂ ਕੱਢਣ ਵਾਲੇ ਨੂੰ ਗ੍ਰਿਫਤਾਰ ਕਰਨ ਦਾ ਦਾਅਵਾ ਕੀਤਾ ਹੈ। ਜਿਸ ਦੀ ਪਛਾਣ ਓਮ ਪ੍ਰਕਾਸ਼ ਵਾਸੀ ਮੰਡੀ ਗੋਬਿੰਦਗੜ੍ਹ ਵਜੋਂ ਹੋਈ ਜੋ ਮੋਤੀਆ ਖਾਨ ’ਚ ਕਾਫੀ ਸਮੇਂ ਤੋਂ ਕੋਰੀਅਰ ਦੀ ਆੜ ’ਚ ਰੇਲਵੇ ਦੀਆਂ ਟਿਕਟਾਂ ਦਾ ਫਰਜ਼ੀਵਾੜਾ ਕਰਦਾ ਸੀ। ਸਬ ਇੰਸਪੈਕਟਰ ਪਵਨ ਕੁਮਾਰ ਨੇ ਦਸਿਆ ਕਿ ਉਕਤ ਵਿਅਕਤੀ ਕੋਲੋਂ 5818 ਰੁਪਏ ਦੀ ਨਕਦੀ,ਚਾਰ ਟਿਕਟਾਂ,ਕੰਪਿਊਟਰ,ਏਟੀਐੱਮ ਕਾਰਡ, ਬੈਂਕ ਦੀ ਪਾਸ ਬੁੱਕ ਬਰਾਮਦ ਹੋਈ ਹੈ। ਉਨ੍ਹਾਂ ਦੱਸਿਆ ਕਿ ਸੀਆਈਬੀ ਅੰਬਾਲਾ ਨੂੰ ਸੂਚਨਾ ਮਿਲੀ ਸੀ ਕਿ ਉਕਤ ਵਿਅਕਤੀ ਰੇਲਵੇ ਦੀਆਂ ਫਰਜ਼ੀ ਈ ਟਿਕਟਾਂ ਕੱਢ ਕੇ ਵਿਭਾਗ ਨੂੰ ਚੂਨਾ ਲਗਾ ਰਿਹਾ ਹੈ। ਜਿਸ ’ਤੇ ਕਾਰਵਾਈ ਕਰਦਿਆਂ ਟੀਮ ਨੇ ਹਰੀ ਓਮ ਕੋਰੀਅਰ ਸਰਵਿਸ ’ਤੇ ਛਾਪਾਮਾਰੀ ਫਰਜ਼ੀ ਟਿਕਟਾਂ ਬਰਾਮਦ ਕਰਕੇ ਉਕਤ ਵਿਅਕਤੀ ਨੂੰ ਗ੍ਰਿਫਤਾਰ ਕਰ ਲਿਆ। ਉਨ੍ਹਾਂ ਦੱਸਿਆ ਕਿ ਉਕਤ ਵਿਅਕਤੀ ਫਰਜ਼ੀ ਆਈਡੀ ਬਣਾ ਕੇ ਲੰਬੇ ਰੂਟ ਦੀਆਂ ਫਰਜ਼ੀ ਟਿਕਟਾਂ ਬੁੱਕ ਕਰ ਲੈਂਦਾ ਸੀ ਬਾਅਦ ’ਚ ਆਪੋ ਆਪਣੇ ਸੂਬਿਆਂ ਨੂੰ ਜਾਣ ਵਾਲੇ ਮਜ਼ਦੂਰਾਂ ਤੋਂ ਵਧੇਰੇ ਪੈਸੇ ਵਸੂਲ ਕੇ ਟਿਕਟਾਂ ਵੇਚ ਦਿੰਦਾ ਸੀ। ਪੁਲਿਸ ਨੇ ਹੋਰ ਪੁਛਗਿੱਨ ਲਈ ਉਕਤ ਵਿਅਕਤੀ ਨੂੰ ਅਦਾਲਤ ’ਚ ਪੇਸ਼ ਕਰਕੇ ਉਸ ਦਾ ਤਿੰਨ ਦਿਨ ਦਾ ਪੁਲਿਸ ਰਿਮਾਂਡ ਹਾਸਲ ਕੀਤਾ ਹੈ।
