ਕਬੂਤਰ ਫੜਨ ਗਏ ਇੱਕ ਨੌਜਵਾਨ ਦੀ ਅਲਫ ਨੰਗਾ ਕਰਕੇ ਕੁੱਟਮਾਰ ਕਰਨ ਅਤੇ ਵੀਡੀਓ ਸੋਸ਼ਲ ਮੀਡੀਆ ਤੇ ਵਾਇਰਲ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ।ਅਮਰਗੜ੍ਹ ਹਸਪਤਾਲ ਵਿਚ ਜ਼ੇਰੇ ਇਲਾਜ ਕੁੱਟਮਾਰ ਦਾ ਸ਼ਿਕਾਰ ਹੋਏ ਪਿੰਡ ਸਰਵਰਪੁਰ ਦੇ ਨੌਜਵਾਨ ਸਨੀ ਉਰਫ ਬੱਬੂ ਨੇ ਦੱਸਿਆ ਕਿ ਉਹ ਆਪਣਾ ਕਬੂਤਰ ਫੜਨ ਲਈ ਗਲੀ ‘ਚ ਲੱਗੇ ਪਿੱਪਲ ਉੱਪਰ ਚੜ੍ਹਿਆ ਸੀ ਪਰ ਜਰਨੈਲ ਸਿੰਘ ਦੇ ਲੜਕੇ ਜੱਸੀ ਅਤੇ ਟਿੱਡੀ ਨੇ ਉਸ ਨੂੰ ਪਿੱਪਲ ਤੋਂ ਖਿੱਚ ਕੇ ਉਤਾਰ ਲਿਆ ਤੇ ਮੇਰੀ ਕੁੱਟਮਾਰ ਸ਼ੁਰੂ ਕਰ ਦਿੱਤੀ।
ਇਸੇ ਦੌਰਾਨ ਉਨ੍ਹਾਂ ਦਾ ਪਿਤਾ ਜਰਨੈਲ ਸਿੰਘ ਉੱਥੇ ਆ ਗਿਆ ਨਾਲ ਹੀ ਉਨ੍ਹਾਂ ਦੇ ਗੁਆਂਢੀ ਬੀਰ ਸਿੰਘ ਅਤੇ ਚਰਨਜੀਤ ਕੌਰ ਆਪਣੇ ਜਵਾਈ ਸਮੇਤ ਮੌਕੇ ਤੇ ਪਹੁੰਚ ਗਏ। ਉਕਤ ਵਿਅਕਤੀ ਮੈਨੂੰ ਘੜੀਸਦੇ ਹੋਏ ਚਰਨਜੀਤ ਕੌਰ ਦੇ ਘਰ ਲੈ ਗਏ ਜਿੱਥੇ ਜਾ ਕੇ ਉਨ੍ਹਾਂ ਮੈਨੂੰ ਨੰਗਾ ਕਰਕੇ ਮੇਰੀ ਬੁਰੀ ਤਰ੍ਹਾਂ ਕੁੱਟਮਾਰ ਕੀਤੀ ਤੇ ਨਗਨ ਹਾਲਤ ਵਿਚ ਮੇਰੀ ਵੀਡੀਓ ਬਣਾ ਕੇ ਸੋਸ਼ਲ ਮੀਡੀਆ ਤੇ ਵਾਇਰਲ ਕਰ ਦਿੱਤੀ।ਪੀੜਤ ਦਾ ਇਲਾਜ ਕਰ ਰਹੀ ਡਾ.ਕਮਲਪ੍ਰੀਤ ਕੌਰ ਨੇ ਦੱਸਿਆ ਕਿ ਨੌਜਵਾਨ ਨੂੰ ਕਾਫੀ ਗੰਭੀਰ ਸੱਟਾਂ ਲੱਗੀਆਂ ਹਨ ਜਿਸ ਦੀ ਇਤਲਾਹ ਸੰਬੰਧਤ ਥਾਣੇ ਨੂੰ ਦੇ ਦਿੱਤੀ ਗਈ ਹੈ। ਇਸ ਸਬੰਧੀ ਜਦੋਂ ਡੀ.ਐੱਸ.ਪੀ ਰਾਜਨ ਸ਼ਰਮਾ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਨ੍ਹਾਂ ਬਿਆਨਾਂ ਦੇ ਆਧਾਰ ਤੇ ਬਣਦੀ ਕਾਰਵਾਈ ਦੀ ਗੱਲ ਆਖੀ।
