ਚੰਡੀਗੜ੍ਹ ਹਸਪਤਾਲ ‘ਚ ਚੱਲੀਆਂ ਗੋਲੀਆਂ, ਇੱਕ ਜ਼ਖ਼ਮੀ

ਚੰਡੀਗੜ੍ਹ : ਜੀਐਮਸੀਐਚ 32 ਦੀ ਪਾਰਕਿੰਗ ਵਿੱਚ ਲੁਧਿਆਣਾ ਨਿਵਾਸੀ ਨੌਜਵਾਨ ਨੂੰ ਮਾਰਨ ਆਏ ਕਰੂਜ਼ ਕਾਰ ਸਵਾਰ ਬਦਮਾਸ਼ਾਂ ਨੇ ਆਈ 20 ਕਾਰ ‘ਤੇ ਤਾਬੜਤੋੜ ਫਾਇਰਿੰਗ ਕੀਤੀ l ਇਸ ਦੌਰਾਨ ਭੈਣ ਦਾ ਇਲਾਜ ਕਰਾਉਣ ਆਏ ਇੱਕ ਹੋਰ ਵਿਅਕਤੀ ਦੀ ਬਾਂਹ ‘ਤੇ ਗੋਲੀ ਜਾ ਲੱਗੀ l ਜਿਸ ਕਰਕੇ ਉਹ ਬੁਰੀ ਤਰ੍ਹਾਂ ਜਖ਼ਮੀ ਹੋ ਗਿਆ l ਜਦ ਕਿ ਕਾਰ ਸਵਾਰ ਮੁਲਜ਼ਮ ਮੌਕ ਤੋਂ ਫਰਾਰ ਹੋ ਗਏ l ਮਾਮਲੇ ਦੀ ਸੂਚਨਾ ਮਿਲਣ ‘ਤੇ ਪਹੁੰਚੀ ਪੁਲਿਸ ਨੇ ਨਾਲਾਗੜ ਨਿਵਾਸੀ ਗੁਰਦਿਆਲ ਨੂੰ ਹਸਪਤਾਲ ਪਹੁੰਚਾਇਆ l ਉੱਥੇ ਹੀ ਪੁਲਿਸ ਲੁਧਿਆਣਾ ਨਿਵਾਸੀ ਜਗਤਾਰ ਤੋਂ ਪੁੱਛਗਿਛ ਕਰਨ ਵਿੱਚ ਲੱਗੀ ਹੋਈ ਹੈ l ਪੁਲਿਸ ਦੀ ਸ਼ੁਰੂਆਤੀ ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਮੁਲਜ਼ਮਾਂ ਨੇ ਕਾਫੀ ਦੇਰ ਤੱਕ ਜਗਤਾਰ ਦਾ ਪਿੱਛਾ ਕੀਤਾ l ਇਸ ਤੋਂ ਬਾਅਦ ਉਨ੍ਹਾਂ ਨੇ ਫਾਇਰਿੰਗ ਸ਼ੁਰੂ ਕਰ ਦਿੱਤੀ l ਸੈਕਟਰ 34 ਥਾਣਾ ਪੁਲਿਸ ਨੇ ਅਣਪਛਾਤੇ ਹਮਲਾਵਰਾਂ ਦੇ ਖਿਲਾਫ਼ ਹੱਤਿਆ ਦੀ ਕੋਸ਼ਿਸ਼, ਆਰਮਜ਼ ਐਕਟ ਸਮੇਤ ਹੋਰ ਧਾਰਾਵਾਂ ‘ਤੇ ਮਾਮਲਾ ਦਰਜ ਕਰ ਤਲਾਸ਼ ਸ਼ੁਰੂ ਕਰ ਦਿੱਤੀ ਹੈ l
ਵਾਰਦਾਤ ਸ਼ੁੱਕਰਵਾਰ ਰਾਤ ਕਰੀਬ 11.30 ਵਜੇ ਦੀ ਹੈ l ਮਿਲੀ ਜਾਣਕਾਰੀ ਅਨੁਸਾਰ ਜੀਐਮਸੀਐਚ 32 ਦੇ ਐਂਟਰੀ ਗੇਟ ਪਾਰਕਿੰਗ ਦੇ ਕੋਲ ਗੋਲੀਆਂ ਚਲਾਈਆਂ ਹਨ l ਸੂਚਨਾ ਮਿਲਣ ‘ਤੇ ਐਸਪੀ ਸਿਟੀ ਵਿਨੀਤ ਕੁਮਾਰ, ਨੇਹਾ ਯਾਦਵ, ਥਾਣਾ ਮੁਖੀ ਬਲਦੇਵ ਕੁਮਾਰ ਸਮੇਤ ਹੋਰ ਟੀਮ ਮੈਕੋ ‘ਤੇ ਪਹੁੰਚੀ l ਪੁਲਿਸ ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਗੁਰਦਿਆਲ ਦੀ ਬਾਂਹ ‘ਤੇ ਗੋਲੀ ਲੱਗੀ ਹੈ l ਜਖ਼ਮੀ ਗੁਰਦਿਆਲ ਨੇ ਦੱਸਿਆ ਕਿ ਉਹ ਆਪਣੀ ਭੈਣ ਦਾ ਜੀਐਮਸੀਐਚ 32 ਵਿੱਚ ਇਲਾਜ ਕਰਵਾਉਣ ਆਇਆ ਸੀ l ਕਿਸੇ ਕੰਮ ਦੇ ਲਈ ਉਹ ਬਾਹਰ ਗਿਆ ਸੀ l ਜਿਵੇਂ ਹੀ ਉਹ ਆਪਣੀ ਕਵਿਡ ਕਾਰ ਪਾਰਕਿੰਗ ਵਿੱਚ ਖੜ੍ਹੀ ਕਰਕੇ ਹਸਪਤਾਲ ਵਿੱਚ ਜਾਣ ਲੱਗਿਆ l ਇਸ ਦੌਰਾਨ ਜ਼ੋਰਦਾਰ ਆਵਾਜ਼ ਆਈ ਅਤੇ ਉਸਦੀ ਬਾਂਹ ਵਿੱਚੋਂ ਖੂਨ ਨਿਕਲਣ ਲੱਗਾ l ਉਸ ਨੂੰ ਕੁਝ ਸਮਝ ਨਹੀਂ ਆਇਆ ਕਿ ਉਸਦੇ ਨਾਲ ਕੀ ਹੋਇਆ ਹੈ l ਇਸ ਤੋਂ ਬਾਅਦ ਪੁਲਿਸ ਨੇ ਜਗਤਾਰ ਦਾ ਬਿਆਨ ਦਰਜ ਕਰਵਾਇਆ ਹੈ l ਬਿਆਨ ਵਿੱਚ ਉਸ ਨੇ ਦੱਸਿਆ ਕਿ ਉਹ ਲੁਧਿਆਣਾ ਦੇ ਸਮਰਾਲਾ ਦਾ ਨਿਵਾਸੀ ਹੈ l ਉਹ ਜੀਐਮਸੀਐਚ 32 ਵਿੱਚ ਆਪਣੇ ਜਾਣਕਾਰ ਦਾ ਇਲਾਜ ਕਰਾਉਣ ਆਇਆ ਹੈ l ਇਸ ਦੌਰਾਨ ਉਸਦੇ ਦੋਸਤਾਂ ਨੇ ਦੱਸਿਆ ਕਿ ਕਾਲੇ ਰੰਗ ਦੀ ਕਰੂਜ਼ ਕਾਰ ਵਿੱਚ ਕੁਝ ਲੋਕ ਉਸ ਦੀ ਕਾਫੀ ਦੇਰ ਤੋਂ ਤਲਾਸ਼ ਕਰ ਰਹੇ ਸਨ l ਉਸਦਾ ਪਿੱਛਾ ਵੀ ਕੀਤਾ ਜਾ ਰਿਹਾ ਸੀ l ਇਸ ਤੋਂ ਬਾਅਦ ਕਰੀਬ ਚਾਰ ਤੋਂ ਪੰਜ ਮੁਲਜ਼ਮਾਂ ਨੇ ਉਸਦੀ ਆਈ 20 ਕਾਰ ‘ਤੇ ਹਮਲਾ ਕੀਤਾ ਅਤੇ ਫ਼ਰਾਰ ਹੋ ਗਏ l ਸ਼ਿਕਾਇਤ ਕਰਤਾ ਨੇ ਪੁਲਿਸ ਨੂੰ ਦੱਸਿਆ ਕਿ ਉਸਦੇ ਦੋਸਤਾਂ ਦੀ ਉਨ੍ਹਾਂ ਨੌਜਵਾਨਾਂ ਨਾਲ ਪਹਿਲਾਂ ਵੀ ਲੜਾਈ ਹੋ ਚੁੱਕੀ ਹੈ l